أسطورة المدرسة

جرس الفسحة ضرب ضرب

صوته كله طرب طرب

الحصة للقراية

والفسحة .....

الفسحة للهواية

وللنشاااااااااااااااااااااااااااااط المدرسى

جرس الفسحة ضرب ضرب

صوته كله طرب طرب       

بعد ما تكمل الأغنية على اليوتيوب ، افتح الأكونت بتاعك على الفيس لو مكنتش فتحته يعنى . هتلاقينى بعتلك الكويز ده 

 

لما الاسم ده بتسمعه " المدرسة " ايه اللى بيجيى فى دماغك ؟

وعندك 8 اختيارات  ، اختار منهم اللى يجيى على مزاجك.

1-أول يوم فيها وأنت مفطور من العياط وماسك فى هدوم ماما أو بابا وحالف براس أبوك أو أمك انك مش هتسيبهم ؟

2-أول صاحب أو صاحبة اتعرفت عليه فى المدرسة  وبادلتوا السندوتشات مع بعض وقمتوا تلعبوا سوا فى الفسحة ؟

3-أول مرة مسكت القلم الرصاص بايديك واكتشفت انه ممكن يكتب ومش بيرسم بس ؟

4-أول عصاية خدتها من الأستاذ أو المس وقعدت تعيط بعديها قبل ما جسمك ينحس بعد كده ؟

5-أول مرة تغش فى ﺇمتحانات الشهر ؟

6-أول مرة تودى الشهادة لبابا وماما ويلاقى فيها كحكة منورة ؟

7-اغسل يديك قبل الأكل وبعده الجملة اللى حفظتها من كتر عشرتها معاك طول سنين الدراسة وانت بتقلب كتب المدرسة على ضهرها بعد ما تزهق من المذاكرة ؟

8-الطابور ولا اليونيفورم ولا تحية العلم ولا الجماعة الصحية ولا اﻹذاعة المدرسية ولا الكانتين ولا الباص ولا كل الحاجات دى مع بعض ؟

 

هاه اخترت ؟

لسه ليه ؟

ده كويز سهل أوى ، ده يمكن أسهل من كويز أنت مين من شخصيات مسلسل العشق الممنوع ؟

ومتخفش الكويز بتاعنا  مفيهوش مقارنة ﺇجابات .

يعنى مش هتتفرس لما تلاقى صاحبك طالع مهند وأنت بشير.

ولا صاحبتك طالعة سمر وانتى طالعة كاتيا الخدامة .

فمحدش يخاف وكله يجمد ماوسه ويتكل على الله وينقر نقرة واحدة بالزر الأيسر للفأرة على الاختيار الذى يرغب به.

واحد بيسألنى  ونجاوب ليه ونقرف نفسنا ، ده الواحد مصدق انه يخلص من أم المدرسة وأيامها السودة؟

 

واحد يقولى : ياستى وهو انتى حد كلمك.

أقوله : وانت مالك ، أنا باخد وادى مع نفسى  ، تعرف كان بيقولى ايه ؟

كان بيقولك ايه ؟

بيقول ليه نجاوب الكويز ؟ أقوله عشان انا عايزة اعمل كتاب عن المدرسة والكتاب لابد ليه من مقدمة .

ياسلام على الكلام

أومال يابنى ، واحد تانى يسألنى

تانىىىىىىىىىى هو انتى بتجيبى الناس دى كلها منيييييييييييييييين

ياعم ماتسيبنى  افضفض ، انت واقف لى على الواحدة كده ليه؟

ماشى لامؤاخذة ، كملى يا ستى.

واحد يسألنى ويقولى : وانتى تكتبى عنها ليه من أصلو ؟

أقوله:

المدرسة دى عالم مليان تفاصيل لدرجة انى مش عارفة ازاى وأنا بقرا الفهرس بتاع أعداد سلسلة ما وراء الطبيعة ، ملاقيش عدد اسمه "أسطورة المدرسة" .

عشان كده قررت أكتبها أنا .

عشان المدرسة دى من أهم الفترات فى حياتنا كلنا . فيها قضينا - ﺇجباريا – 11 سنة للى مدخلوش  حضانة ، 13 سنة للى دخلوا حضانة ومخدوش سنة ستة ، 14 سنة للى دخلوا حضانة وخدوا سنة ستة ، 15 أو 16 أو 17 سنة أو حسب ما يحب هواة السقوط وﺇعادة السنة – من عمرنا .

فيها ذكريات حلوة وذكريات وحشة . اتعلمنا فيها حاجات ومتعلمناش حاجات تانية.

 

حبيناها عشان أصحابنا وكرهناها عشان منصحاش بدرى ونلعب ونخرج ونتفرج على التليفزيون بدل ما نذاكر.

كلام جميل ، كلام معقول ، مقدرش أقول غير " كفاية مقدمات بقى وخشى فى الموضوع بدل ما أرمى كتابك ده فى الزبالة ولا أعمله قراطيس لب "

طب ياعم  متتحمئش كده ، صلى على النبى.

اللهم صلى عليه ، يارب نخلص.

نبدأ ونقول : بسم الله الرحمن الرحيم

طبعا زى ماهو معروف للكل أن المعادلة التعليمية المعملية الفذة بتتكون من 3 مكونات رئيسية مع بعض التحابيش وهى :

المدرسة + المدرس + الطالب = متهيألى تعليم

أما التحابيش فهى  الدروس طبعا .

والتحبيشة بتاعة الدروس دى طلعت من ايدين طباخ ولا أسامة السيد لدرجة أنها قدرت تتفوق على واحدة من المكونات الرئيسية لوجبة الساد تعليم  ( لأنى مش متهيألى التعليم فى مصر مر عليه يوم عدل عشان يبقى هابى ) وهى المدرسة .

وفيه شوية ﺇضافات كده ممكن ترميها فى الزبالة عشان ديما بايظة وتجيب المرض زى الوزارة مثلا.

وبما أننا عرضنا عليكم المقادير نخش على طريقة العمل ومعلش خلوا التليفونات فى الآخر.
 8/7/2012
رضوى